კომპანია Liebherr -ის ისტორია დაიწყო 1949 წელს, როდესაც Liebherr -მა თავისი პირველი

კოშკურა ამწე შექმნა.

მე-2 მსოფლიო ომის დასრულების შემდეგ გერმანიაში დაიწყო მაშტაბური მშენებლობების ბუმი.

ჰანს ლიბჰერი ამ პერიოდისათვის თავისი მშობლების სამშენებლო ფირმას ხელმძღვანელობდა.

მუშაობის პროცესში ის განიცდიდა სამშენებლო ტექნიკისა და სამუშაო დანადგარების დეფიციტს.

რაც საკმაოდ დიდ პრობლემებს უქმნიდა მის საქმიანობას, ამიტომ 1949 წელს ჰანსმა კონსტრუქტორების ჯგუფთან და პროფესიონალ ხელოსნებთან ერთად შექმნა თავისი პირველი მობილური მბრუნავი კოშკურა ამწე, რომელსაც ეწოდა ”ТК 10”.

ამწეს მთავარი უპირატესობა მდგომარეობდა მის მობილურობაში. შესაძლებელი იყო მისი თითქმის ნებისმიერ ადგილას მცირე დროში დამონტაჟება და სამუშაოდ გამართვა. გამომდინარე იქიდან, რომ იმ პერიოდში არამარტო ჰანსის სამშენებლო კომპანია განიცდიდა სამშენებლო ტექნიკის დეფიციტს ”ТК 10” ამწემ დიდი ინტერესი გამოიწვია. იმავე წელს ჰანსმა გერმანიის ქალაქ კირჰდორფში დააარსა მანქანათმშენებელი ქარხანა სადაც დაიწყო სამშენებლო ამწეების სერიული წარმოება. აი ასე გარდაიქმნა პატარა სამშენებლო ფირმა დამოუკიდებელ მანქანათმშენებელ საწარმოდ.

1953 წელს ჰანს ლიბჰერმა დაიქირავა ბაგირიანი ექსკავატორი, რომლის მოხმარების პროცესშიც მან შეამჩნია ექსკავატორის დიდი წონისა და მისი მცირე სიმძლავრის არაპროპორციულობა. 8 თვის შემდეგ ჰანს ლიბჰერმა წარმოადგინა ექსკავატორი ”L 300” - პირველი ჰიდრავლიკური ექსკავატორი ევროპაში. პროფესიონალურ წრეებში ”L 300” - მა დიდი აღფრთოვანება გამოიწვია. Liebherr -მა ახალი ექსკავატორის სერიული წარმოება 1954 წელს დაიწყო.

ერთ დღეს ჰანს ლიჰერს თავისმა ნაცნობმა, ბანკის ფილიალის მმართველმა უთხრა, რომ გასაყიდად იყო გამოტანილი მაცივრების საწარმო. მას შემდეგ რაც ჰანსმა შეისწავლა აღნიშნული სფეროს ტექნიკური მხარე, გააანალიზა გაყიდვების სტატისტიკა და განსაზღვრა გასაყიდი საბაზრო პუნქტები მან საკმაოდ დიდი პოტენციალი დაინახა სამომხმარებლო მაცივრების ტექნოლოგიის განვითარებაში.

იმ პერიოდისათვის გერმანიაში მაცივარი მხოლოდ ყოველ მე-10 ოჯახს ჰქონდა სახლში. ჰანსი მიხვდა, რომ ეკონომიკური აღმავლობის პირობებში საყოფაცხოვრებო ტექნიკაზე მოთხოვნა პროპორციულად გაიზრდებოდა. ამიტომ მან ქალაქ ოქსენჰაუზენში ააშენა თავისი საკუთარი საწარმო სადაც 1954 წელს შეიქმნა Liebherr -ის პირველი მაცივარი, ხოლო ერთი წლის შემდეგ დაიწყო საყოფაცხოვრებო ტექნიკის სერიული წარმოება.

დღეისათვის Liebherr -ის საყოფაცხოვრებო მაცივრები გამოირჩევა მაღალი ხარისხით და ფუნქციონალური დიზაინით. თავისი დანიშნულების სეგმენტით Liebherr -ის მაცივრები და სხვა საყოფაცხოვრებო ტექნიკა ძირითადად წარმოდგენილი არიან მაღალი კლასის საყოფაცხოვრებო ტექნიკის ბაზარზე. ამიტომაც მაღალფასიან პროდუქციას Liebherr გარანტირებულად უზრუნველყოფს უმაღლესი ხარისხით და თანამედროვე ტექნიკური ინოვაციებით.

ჰანს ლიბჰერი 1993 წელს 78 წლის ასაკში გარდაიცვალა. მის კომპანიაზე ზრუნვა მისმა შთამომავლებმა განაგრძეს. დღეისათვის ”Liebherr ”  აერთიანებს 130-ზე მეტ კომპანიას, რომლებიც წარმოდგენილი არიან მსოფლიოს სხვადასხვა ქვეყნებში 41 500 თანამშრომლით. Liebherr -ის სავაჭრო ბრუნვა აღწევს 8 მილიარდ ევროს წელიწადში. კომპანიის მოღვაწეობის სფეროებია: სამშენებლო ტექნიკა და დანადგარები, საყოფაცხოვრებო ტექნიკა, საავიაციო მაკომპლექტებელი ნაწილები და დანადგარები, ლოგისტიკა, სასტუმრო ბიზნესი და სხვა.